اسلام آباد:اسلام آباد ہائیکورٹ بار ایسوسی ایشن کے وکلا میں سرٹیفکیٹ تقسیم کرنے کی تقریب میں خطاب کرتے ہوئے جسٹس طارق محمود جہانگیری نے وکلا کے لیے اپنی یادیں شیئر کیں۔ انہوں نے کہا کہ اسلام آباد کی عدالتیں شروع میں راولپنڈی کے گلی محلوں میں واقع تھیں، اور جب ہم ایک عدالت میں پیش ہوتے تھے تو دوسرے کیسز کو ملتوی کرنا پڑتا تھا۔ تاہم، آج وکلا کے لیے یہ سب کچھ آسان ہوگیا ہے کیونکہ موجودہ کورٹ کمپلیکس میں تمام سہولتیں میسر ہیں۔
جسٹس طارق نے وکلا کے بارے میں کہا کہ جب وہ کیس کی تیاری کے بغیر عدالت آتے ہیں تو بہت دکھ ہوتا ہے، کیونکہ ہائیکورٹ میں کیسز کی تیاری کے لیے وہ ساری رات محنت کرتے تھے۔
انہوں نے مزید کہا کہ انہوں نے کبھی کسی عہدے کے لیے سفارش نہیں کی، بلکہ اپنے کام کے ذریعے عہدے حاصل کیے۔ جج بننے کے لیے بھی انہوں نے کبھی کسی سے سفارش کا نہیں کہا۔ اپنی وکالت کا آغاز ایک معمولی سطح سے کیا اور پھر ہائیکورٹ کا جج بنے۔
آخر میں، جسٹس طارق محمود جہانگیری نے گاڑیوں کی نمبر پلیٹس پر "ایڈووکیٹ" لکھنے کو غیر قانونی قرار دیتے ہوئے اس پر عملدرآمد کی اہمیت پر زور دیا۔
