دبئی : انٹرنیشنل کرکٹ کونسل (آئی سی سی) نے چیمپئنز ٹرافی 2025 کی انعامی رقم کا اعلان کردیا ہے۔ اس ایڈیشن کی مجموعی انعامی رقم میں پچھلے ایڈیشن کے مقابلے میں 53 فیصد اضافہ کیا گیا ہے، جو اب 69 لاکھ ڈالرز تک پہنچ گئی ہے۔
آئی سی سی کے مطابق، چیمپئنز ٹرافی کی فاتح ٹیم کو 22 لاکھ 40 ہزار ڈالرز کی انعامی رقم ملے گی، جبکہ رنر اپ ٹیم کو 11 لاکھ 20 ہزار ڈالرز ملیں گے۔ سیمی فائنل میں ہارنے والی دونوں ٹیموں کو 5 لاکھ 60 ہزار ڈالرز ملیں گے، اور ہر گروپ میچ جیتنے پر ٹیموں کو 34 ہزار ڈالرز کی انعامی رقم دی جائے گی۔
اس کے علاوہ، پانچویں اور چھٹے نمبر پر آنے والی ٹیموں کو 3 لاکھ 50 ہزار ڈالرز ملیں گے، جبکہ ساتویں نمبر پر آنے والی ٹیم کو ایک لاکھ 40 ہزار ڈالرز کی انعامی رقم ملے گی۔ ہر ٹیم کو ایونٹ میں شرکت کے لیے ایک لاکھ 25 ہزار ڈالرز بھی ملیں گے۔
یاد رہے کہ آئی سی سی چیمپئنز ٹرافی 19 فروری سے 9 مارچ تک پاکستان کی میزبانی میں کھیلی جائے گی، جبکہ بھارت اپنے میچز دبئی میں کھیلے گا۔