اسلام آباد : پاکستان کی سپریم کورٹ میں 6 نئے مستقل ججز اور ایک قائم مقام جج نے حلف اٹھا لیا۔ یہ تقریب پہلی بار سپریم کورٹ کے عدالتی احاطے کے لان میں منعقد ہوئی، جہاں چیف جسٹس پاکستان یحییٰ آفریدی نے تمام سات ججز سے حلف لیا۔
نئے مستقل ججز میں جسٹس عامر فاروق، جسٹس اشتیاق ابراہیم، جسٹس شکیل احمد، جسٹس شفیع صدیقی، جسٹس صلاح الدین پنہور، اور جسٹس ہاشم کاکڑ شامل ہیں۔ اس کے علاوہ، جسٹس میاں گل حسن اورنگزیب نے قائم مقام جج کے طور پر حلف اٹھایا۔ اس اہم تقریب میں سپریم کورٹ اور ہائیکورٹ کے ججز، اٹارنی جنرل، سپریم کورٹ بار اور پاکستان بار کے عہدیداران، سینئر وکلا، ججز کے اہلخانہ اور رفقاء نے شرکت کی۔
یہ تقرری وفاقی وزارت قانون و انصاف کی جانب سے جاری کیے گئے نوٹیفکیشن کے بعد عمل میں آئی، جس میں سپریم کورٹ کے سات نئے ججز اور مختلف ہائیکورٹس کے قائم مقام چیف جسٹسز کی تقرری کا اعلان کیا گیا تھا۔ یاد رہے کہ اس تقریب کو ایک دن کے لیے ملتوی کیا گیا تھا، جس کے بعد اب حلف برداری کی تقریب منعقد ہوئی۔