پینسلوانیہ : امریکہ کے مشرقی ساحل پر چار بینک لوٹنے والی ’گلابی پھولن دیوی‘ کو فیڈرل بیورو آف انویسٹی گیشن (ایف بی آئی) نے اتوار کو گرفتار کرلیا۔
35 سالہ کیرکی بائیز کو ان کے مشتبہ ساتھی 38 سالہ الکسیس مورالیس کے ہمراہ گرفتار کیا گیا۔
اس جوڑے کو پہلی ڈکیتی کے ایک مہینے بعد شارلٹ ہوٹل سے گرفتار کیا گیا۔ ایک ماہ قبل دونوں نے پینسلوانیہ کے ارٹاؤن بینک میں ڈکیتی کی واردات کی تھی۔ اس کے بعد 20 جولائی کو کی جانے والی ڈکیتی کے تین دن بعد ڈیلوئیر رہبوتھ میں ایم اینڈ ٹی بینک میں ڈکیتی کی گئی۔
24 جولائی کو کیرکی نے نارتھ کیرولینا کے علاقے ایڈن کے جنوبی بینک میں ڈکیتی کی۔ ان کی جانب سے کی جانے والی تازہ ترین ڈکیتی کی واردات نارتھ کیرولینا کے علاقے ہاملیٹ میں واقع بی بی اینڈ ٹی بینک میں جمعے کو کی گئی۔
ان میں سے کم سے کم تین وارداتوں میں ملزمہ کی جانب سے بینک کیشئیر کو لکھ کر رقم دینے کا مطالبہ کیا گیا تھا۔ایف بی آئی نے گرفتاری سے قبل ’گلابی پھولن دیوی‘ کی گرفتاری میں مدد دینے کے عوض دس ہزار ڈالر انعام کا اعلان بھی کر رکھا تھا۔