سیہون: وزیر اعلیٰ سندھ سید مراد علی شاہ نے کہا ہے کہ کینالز کے منصوبے کے خلاف چیئرمین بلاول بھٹو زرداری کا موقف بالکل واضح ہے اور اس منصوبے پر عملدرآمد نہیں ہوگا۔ انہوں نے دعویٰ کیا کہ ان کا کیس بہت مضبوط ہے اور جو بھی اس پر غور کرے گا، وہ اسے ترک کر دے گا۔
اپنے والد عبداللہ شاہ کی برسی کے موقع پر میڈیا سے بات کرتے ہوئے، مراد علی شاہ نے کہا کہ اللہ تعالیٰ مجھے اپنے والد کے نقش قدم پر چل کر عوام کی خدمت کرنے کی ہمت دے۔ انہوں نے ملک کی بہتری کے لیے تمام سیاسی جماعتوں اور اداروں سے مل کر کام کرنے کی ضرورت پر زور دیا۔
مراد علی شاہ نے کہا کہ چیئرمین بلاول بھٹو زرداری نے کہا ہے کہ وہ عوام کے ساتھ ہیں اور کینالز کے منصوبے پر وزیراعظم کا ساتھ نہیں دیں گے۔ اس سلسلے میں 18 اپریل کو حیدرآباد میں چیئرمین بلاول بھٹو زرداری کا ایک جلسہ بھی ہوگا جس میں ان کے اس موقف کو مزید تقویت دی جائے گی۔
انہوں نے پی ٹی آئی کے رہنما اعظم سواتی کے مذاکرات کے حوالے سے کہا کہ انہیں اس بات کا علم نہیں ہے کہ مذاکرات کا کس کو مینڈیٹ دیا گیا ہے۔ ان کا کہنا تھا کہ پی ٹی آئی کے اندر شدید اختلافات ہیں اور اس جماعت کے رہنماؤں کے بیانات میں تبدیلیاں آتی رہتی ہیں۔ اس لیے، انہیں نہیں لگتا کہ پی ٹی آئی والے بات چیت کے لیے تیار ہوں گے۔
ایم کیو ایم کے حالیہ بیانات پر تبصرہ کرتے ہوئے، مراد علی شاہ نے کہا کہ اگر کراچی میں بدامنی ہوئی تو 80 اور 90 کی دہائیوں کی یادیں دوبارہ زندہ ہو سکتی ہیں۔ انہوں نے کہا کہ کراچی کے امن کو کسی بھی قیمت پر خراب ہونے نہیں دیا جائے گا۔
