راولپنڈی: پاک فوج کے شعبہ تعلقات عامہ (آئی ایس پی آر) کے مطابق مراکش فضائیہ کے انسپکٹر میجر جنرل محمد غدیح نے ایئر ہیڈکوارٹرز اسلام آباد کا دورہ کیا، جہاں انہوں نے ایئر چیف مارشل ظہیر احمد بابر سدھو سے اہم ملاقات کی۔
ملاقات کے دوران میجر جنرل غدیح نے پاک فضائیہ کی ٹیکنالوجی کے شعبے میں کامیاب پیشرفت اور جدید صلاحیتوں کو سراہا۔ دونوں افواج کے رہنماؤں نے دو طرفہ تعلقات کو مزید مستحکم کرنے اور دفاعی شعبے میں تعاون بڑھانے کی خواہش کا اظہار کیا۔ اس موقع پر عسکری تربیت، مشترکہ آپریشنز، اور صنعتی شعبے میں تعاون پر بھی تفصیل سے گفتگو کی گئی۔
ایئر ہیڈکوارٹرز پہنچنے پر میجر جنرل محمد غدیح کو گارڈ آف آنر پیش کیا گیا، جو پاک فضائیہ کی روایات اور دونوں ممالک کے درمیان احترام کا غماز تھا۔ ملاقات میں دونوں جانب سے مزید مشترکہ منصوبوں پر کام کرنے کی اہمیت پر زور دیا گیا، تاکہ دونوں فضائیہ کی صلاحیتوں میں مزید اضافہ ہو سکے۔
اس ملاقات کو دونوں ممالک کے درمیان فضائی دفاعی تعلقات کو فروغ دینے کے لحاظ سے ایک اہم قدم قرار دیا جا رہا ہے۔
