مالاکنڈ: مالاکنڈ کے علاقے پلئی شاہ کوٹ میں کاؤنٹر ٹیررازم ڈیپارٹمنٹ (سی ٹی ڈی) اور دہشت گردوں کے درمیان ہونے والی جھڑپ میں 4 دہشت گرد ہلاک ہوگئے۔ سی ٹی ڈی ذرائع کے مطابق، ہلاک ہونے والے دہشت گرد ایک جرائم پیشہ گروہ کا حصہ تھے، جو قتل، بھتہ خوری اور دیگر سنگین وارداتوں میں ملوث تھا۔
ذرائع نے بتایا کہ سی ٹی ڈی کی فورسز اور دہشت گردوں کے درمیان کئی گھنٹوں تک فائرنگ کا تبادلہ ہوتا رہا، جس میں تین دہشت گرد موقع پر ہی مارے گئے، جب کہ ایک دہشت گرد پہاڑی علاقے میں فرار ہو گیا۔
فرار ہونے والے دہشت گرد کی گرفتاری کے لیے فورسز نے رات بھر سرچ آپریشن جاری رکھا۔ صبح ہوتے ہی، فورسز نے ظلم کوٹ کے علاقے میں اس دہشت گرد کا تعاقب کیا، جس کے نتیجے میں اس کی دوبارہ جھڑپ ہوئی اور وہ مارا گیا۔ اس کے بعد فورسز نے علاقے کو کلیئر کر لیا۔
سی ٹی ڈی ذرائع کا کہنا ہے کہ اس کارروائی کے نتیجے میں علاقے میں امن و سکون قائم کرنے میں مدد ملی ہے، اور دہشت گردوں کے خلاف آپریشن مزید جاری رکھا جائے گا۔
