کراچی: پاکستان کی معروف اداکارہ ہانیہ عامر نے بالی وڈ کے سپر سٹار شاہ رخ خان سے ملنے کی اپنی خواہش کا اظہار کیا ہے۔ ہانیہ کی ایک ویڈیو سوشل میڈیا پر وائرل ہو رہی ہے جس میں وہ شاہ رخ خان سے ملاقات کی خواہش کرتی ہوئی نظر آ رہی ہیں۔
ہانیہ عامر اس وقت مختلف ممالک میں اپنے مداحوں سے ملاقات اور انٹرویوز کے لیے دوروں پر ہیں، اور ان کی ویڈیوز بھی سوشل میڈیا پر پوسٹ ہو رہی ہیں۔ ان کے دورے اور ویڈیوز عالمی سطح پر بھی توجہ کا مرکز بنے ہوئے ہیں۔
ایک حالیہ ویڈیو میں جب ہانیہ سے شاہ رخ خان سے ملنے کے بارے میں سوال کیا گیا تو انہوں نے جواب دیا، "شاہ رخ خان اگر آپ یہ دیکھ رہے ہیں، تو پلیز مجھ سے مل لیں۔اداکارہ نے مزید کہا کہ انہیں افسوس ہے کہ وہ اب تک شاہ رخ خان سے نہیں مل سکیں، اور یہ ان کے لیے ایک بڑی خواہش ہے۔ "میرے ذہن میں تو یہ ہے کہ ہمیں دوست ہونا چاہیے۔
واضح رہے کہ ہانیہ عامر شاہ رخ خان کی بڑی مداح ہیں اور وہ ان کے مخصوص انداز میں ویڈیوز بھی بنا چکی ہیں، جو ان کے مداحوں میں کافی پسند کی گئی ہیں۔