اسلام آباد: چیئر مین پی ٹی آئی عمران خان ، اسد عمر اور فواد چوہدری کے خلاف توہین الیکشن کمیشن کیس کی سماعت 6 دسمبر تک ملتوی کر دی گئی۔
ممبر نثار درانی کی سربراہی میں چار رکنی بنچ نے عمران خان، اسد عمر اور فقاد چودھری کیخلاف توہین الیکشن کمیشن کیس کی سماعت کی۔ سماعت میں چیئر مین پی ٹی آئی، اسد عمر اور فواد چوہدری پیش نہ ہوئے۔
معاون وکیل نے عدالت میں مؤقف پیش کرتے ہوئے استدعا کی کہ وکیل صاحب سپریم کورٹ ہیں، تھوڑی دیر کے لئے سماعت روک لیں۔کمیشن سربراہ نثاردرانی نے استفسار کیا کہ کیا انہوں نے آنا ہے؟ ہم نے پھرحلقہ بندیوں کی بھی سماعت کرنی ہے، سیکورٹی خدشات ہیں تو جیل میں سماعت نوٹیفائی کرسکتے ہیں۔
سیکریٹری داخلہ نے عدالت میں بیان دیا کہ اگر آپ جیل جانا چاہتے ہیں تو نوٹیفائی کرسکتے ہیں، ہم اجازت دیتے ہیں کہ جیل میں سماعت کرلیں۔ممبر کمیشن نے استفسار کیا کہ کیا قانون اس کی اجازت دیتا ہے۔ جس پر سیکریٹری داخلہ نے کہا کہ اس حوالے سے وزارت قانون سے رائے لے لیتا ہوں۔
فوادچوہدری کے وکیل نے مؤقف پیش کیا کہ سابق وفاقی وزیر جوڈیشل کسٹڈی میں ہیں۔ ممبر سندھ نثار درانی نے استفسار کیا کہ فوادچوہدری کس جیل میں ہیں۔ جس پر فواد چوہدری کے وکیل نے بتایا کہ وہ اڈیالہ جیل میں قید ہیں۔ ممبر سندھ نثار درانی نے ریمارکس دیئے کہ ٹھیک ہے اس پرآرڈرکردیتے ہیں۔
اسد عمر کی جانب سے کوئی بھی الیکشن کمیشن میں پیش نہیں ہوا۔ صائمہ جنجوعہ نے بتایا کہ اسد عمرکے وکیل نےالتوا کی درخواست کی ہے۔
الیکشن کمیشن نے کیسز کی سماعت 6 دسمبرتک ملتوی کردی۔
