اسلام آباد: پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے کہا ہے کہ شوکت ترین اور میں نے ” نیوٹرلز“ کو خبر دار کیا تھا کہ اگر سازش کامیاب ہو گئی تو ملکی معیشت کا نقصان ہو گا۔
تفصیلات کے مطابق سابق وزیراعظم عمران خان نے سماجی رابطوں کی ویب سائٹ ٹوئٹر پر جاری پیغام میں لکھا ’مارکیٹ پالیسی اور ایکشن کا انتظار کر رہی ہے ، جو کہ امپورٹڈ حکومت فراہم کرنے میں ناکام رہی ، شوکت ترین اور میں نے ’ نیوٹرلز‘ کو خبردار کیا تھا کہ اگر سازش کامیاب ہو گئی تو ہماری کمزور معیشت کی بحالی کا سفر خلم ہو جائے گا، اب ایسا ہی ہوا ہے۔‘
ایک اور ٹویٹ میں سابق وزیراعظم نے لکھا ’روپے کی قدر اب تک کی سب سے کم ترین سطح 193 روپے فی ڈالر پر پہنچ چکی ہے جبکہ آٹھ مارچ کو یہ قیمت 178 روپے فی ڈالر تھی ، شرح سود 1998 کے بعد سے سب سے زیادہ 15 فیصد ہو چکی ہے ، سٹاک مارکیٹ میں 3 ہزار پوائنٹس کی کمی ہو چکی ہے ، جس سے مارکیٹ کو 604 ارب روپے کا نقصان پہنچاہے ، جنوری 2020ءکے بعد افراط زر اپنی بلند ترین سطح 13.4 فیصد پر پہنچ گیا ہے ،جو کہ امپورٹڈ حکومت پر اب تک کے سب سے کم اعتماد کی عکاسی کرتاہے۔‘