اسلام آباد : قومی اسمبلی میں جعفر ایکسپریس پر حملے کی شدید مذمت کرتے ہوئے متفقہ طور پر ایک قرارداد منظور کی گئی۔ یہ قرارداد وفاقی وزیر پارلیمانی امور، طارق فضل چودھری نے پیش کی اور ایوان نے اسے مکمل حمایت کے ساتھ منظور کیا۔
قرارداد کے متن میں جعفر ایکسپریس پر حملے اور تمام دہشت گردی کے واقعات کی مذمت کی گئی ہے۔ اس میں واضح طور پر کہا گیا کہ قومی سلامتی سے متصادم نظریات کو پھیلنے کی اجازت نہیں دی جائے گی اور ملک کو عدم استحکام کا شکار کرنے والے عناصر کے خلاف سخت کارروائی کی جائے گی۔
ایوان میں پیش کردہ قرارداد میں حادثے میں جاں بحق ہونے والے معصوم شہریوں کے ساتھ اظہار یکجہتی کیا گیا، اور بہادر سکیورٹی فورسز کی ستائش کی گئی۔ مزید برآں، قرارداد میں دہشت گردی کے خلاف عوام کے منظم ہونے کا اعادہ کیا گیا، اور یہ کہا گیا کہ دہشت گردی کے خلاف کوئی تفریق نہیں کی جائے گی، تمام رنگ و نسل کے لوگ متحد ہو کر اس کا مقابلہ کریں گے۔