نیویارک : امریکا میں سکھوں کی عالمی تنظیم سکھ فار جسٹس نے بلوچستان میں جعفر ایکسپریس پر دہشت گرد حملے کے حوالے سے ایک بیان جاری کیا ہے۔ تنظیم کے رہنما گرپتونت سنگھ پنوں نے اپنے بیان میں کہا ہے کہ اس حملے میں بھارتی خفیہ ایجنسی را (Research and Analysis Wing) ملوث ہے اور عالمی اداروں کو بھارتی قومی سلامتی کے مشیر اجیت دوول اور را کے خلاف کارروائی کرنی چاہیے۔
گرپتونت سنگھ نے مزید کہا کہ بھارت پاکستان کے خلاف خفیہ جنگی حکمت عملی کے بلیو پرنٹ پر عمل کر رہا ہے اور مودی کی حکومت ایک دہشت گرد حکومت ہے، جو صرف علاقائی نہیں بلکہ عالمی سطح پر دہشت گردی کی سرپرستی کر رہی ہے۔ ان کا کہنا تھا کہ بھارت عالمی سطح پر اپنے مخالفین کے قتل، انتہا پسندی، اور سرحد پار دہشت گردی میں ملوث ہے۔
انہوں نے یہ بھی کہا کہ بلوچستان میں ٹرین پر حملہ بھارت کے جارحانہ دفاعی نظریے کا ثبوت ہے، اور بھارت کی یہ خفیہ دہشت گردانہ کارروائیاں پڑوسی ممالک کے استحکام کو نقصان پہنچانے کی کوشش ہیں۔ گرپتونت سنگھ نے بھارت کی انٹیلی جنس ایجنسی را کی بے قابو کارروائیوں پر تنقید کی اور مطالبہ کیا کہ ان پر سفارتی اور سکیورٹی پابندیاں لگائی جائیں تاکہ دنیا بھارت کی خفیہ دہشت گردانہ کارروائیوں سے آنکھیں نہ بند کرے۔
آخر میں انہوں نے کہا کہ اگر بھارت کا احتساب نہ کیا گیا تو اس کا اگلا حملہ اور بھی زیادہ معصوم جانوں کا نقصان کر سکتا ہے۔
