لاہور : محکمہ داخلہ پنجاب نے نادرا کو تمام اسلحہ لائسنسز کی آن لائن تصدیق کے لیے کیو آر کوڈ جاری کرنے کی ہدایت کی ہے۔ ترجمان محکمہ داخلہ پنجاب کے مطابق، سیکرٹری داخلہ نورالامین مینگل کی زیرِ صدارت اسلحہ لائسنس کی تصدیق کے حوالے سے ایک اہم اجلاس ہوا، جس میں سپیشل سیکرٹری داخلہ فضل الرحمان، ایڈیشنل سیکرٹری داخلہ (جوڈیشل) عمران حسین رانجھا اور نادرا حکام نے شرکت کی۔
اجلاس کے دوران سیکرٹری داخلہ نے نادرا حکام کو اسلحہ لائسنسز پر کیو آر کوڈ لگانے کے لیے ایک ہفتے کا وقت دیا۔ اس کے علاوہ نادرا کو اسلحہ لائسنسز کو متعلقہ شخص کے شناختی کارڈ سے لنک کرنے کی بھی ہدایت کی گئی۔ پنجاب بھر کے کمشنرز اور ڈپٹی کمشنرز کو بھی اسلحہ لائسنسز کے حوالے سے تمام آرڈرز پر کیو آر کوڈ فراہم کرنے کی ہدایت کی گئی۔
سیکرٹری داخلہ پنجاب نورالامین مینگل کا کہنا تھا کہ اس طرح کے تصدیقی عمل سے جعلی لائسنسز کا خاتمہ ہوگا اور شفافیت کو فروغ ملے گا۔ ان کا کہنا تھا کہ سنگین جرائم میں ملوث افراد اسلحہ لائسنس کے لیے نااہل ہیں اور آرمز رولز میں ترامیم کے ذریعے شہریوں کے لیے سہولت فراہم کی جا رہی ہے۔ انفرادی اسلحہ لائسنس اور بزنس آرمز لائسنس کے قواعد کو عام فہم بنانے کی کوشش کی جا رہی ہے۔
نورالامین مینگل نے مزید کہا کہ اسلحہ لائسنس کی تصدیق کے لیے ڈائریکٹوریٹ آف مانیٹرنگ کا کردار بڑھایا جا رہا ہے اور اسلحہ لائسنس کے حصول اور تجدید کے لیے فیسوں کے شیڈول میں تبدیلی کی سفارش کی گئی ہے۔ اس کے ساتھ ساتھ مینوئل لائسنس کی کمپیوٹرائزیشن کے تمام مراحل کی نگرانی بھی کی جا رہی ہے۔ کیو آر کوڈ کی مدد سے قانون نافذ کرنے والے ادارے ہر اسلحہ لائسنس کی تصدیق بھی کر سکیں گے۔
