لاہور: پاکستان سپر لیگ (پی ایس ایل) کے دسویں ایڈیشن کے لیے پلیئرز ڈرافٹ کی تیاریاں مکمل کر لی گئی ہیں، اور آج سے فرنچائزز اپنی اپنی ٹیمیں تشکیل دینے کے لیے کھلاڑیوں کا انتخاب کریں گی۔ ڈرافٹ کی تقریب آج دوپہر ایک بجے لاہور کے حضوری باغ میں ہو گی، جہاں تمام 6 فرنچائزز پلاٹینم، ڈائمنڈ، گولڈ، سلور، ایمرجنگ اور سپلیمنٹری کیٹیگری میں کھلاڑیوں کا انتخاب کریں گی۔
اس ایڈیشن کے لیے دنیا بھر سے معروف کرکٹرز ڈرافٹ میں شامل ہو چکے ہیں۔ نیوزی لینڈ کے کین ولیمسن، ڈیرل مچل، ٹم ساؤتھی اور مارک چیپ مین کے علاوہ آسٹریلیا کے ڈیوڈ وارنر، عثمان خواجہ، میتھیو شارٹ اور شان ایبٹ نے بھی رجسٹریشن کرائی ہے۔ انگلینڈ کے جیسن روئے، ایلکس ہیلز اور زیک کرولی کے ساتھ بنگلا دیش کے مستفیض الرحمان اور شکیب الحسن بھی ڈرافٹ میں شامل ہیں۔
افغانستان کے مجیب الرحمان سمیت دیگر غیر ملکی کھلاڑی بھی ڈرافٹ میں حصہ لے رہے ہیں، جس سے پی ایس ایل 10 کے میچز میں ایک نیا جوش اور جوہر دیکھنے کو ملے گا۔