لاہور : ملک کے مختلف شہروں میں دھند کا راج رہا جس کے باعث حد نگاہ کم ہونے کی وجہ سے متعدد موٹر ویز بند کر دی گئیں، جس سے مسافروں کو شدید مشکلات کا سامناہے۔
موٹروے ایم3 لاہور سے رجانہ تک ٹریفک کے لیے بند کر دی گئی، جبکہ ایم4 پر شور کوٹ سے ملتان تک داخلہ ممنوع قرار دیا گیا۔ اسی طرح موٹروے ایم5 پر بھی ملتان سے روہڑی تک انٹری بند کر دی گئی۔ قومی شاہراہوں پر بھی حد نگاہ کم ہونے کے باعث ٹریفک کی روانی متاثر ہوئی۔
اس کے علاوہ، ملک کے مختلف شہروں میں سردی کی شدت برقرار رہی۔ اسلام آباد، مری، گلیات اور بالائی علاقوں میں کہرا پڑنے کا امکان ہے، جب کہ بلوچستان کے شمال مغربی اضلاع میں جزوی ابر آلود موسم رہنے کی پیش گوئی کی گئی۔ بالائی علاقوں میں شدید سردی کا سامنا رہا، اور سکردو، استور، گوپس اور لہہ میں پارہ منفی 10 تک گر گیا، جبکہ بگروٹ، کالام اور گلگت میں درجہ حرارت منفی 6 رہا۔
