لاہور: صوبائی وزیر تعلیم مراد راس نے کورونا وائرس کے نئے ویرئنٹ اومی کرون کے پھیلاؤ کے باعث سکولوں کی بندش کے حوالے سے موقف دیتے ہوئے کہا کہ میرے خیال میں سکولوں سے پہلے دیگر سرگرمیوں پر پابندی عائد ہونی چاہئے۔
تفصیلات کے مطابق وزیرتعلیم پنجاب نے سماجی رابطوں کی ویب سائٹ ٹوئٹر پر جاری اپنے پیغام میں لکھا کہ لوگ مجھ سے پوچھتے ہیں سکول بند ہونے چاہئیں یا نہیں؟ تو میں ان تما م پوچھنے والوں سے کہتا ہوں کہ میری رائے میں سکولوں سے پہلے دیگر سرگرمیاں بالخصوص سماجی سرگرمیوں کو روکنا ہو گا۔ سکولوں کو بند کرنے کا آپشن آخری ہونا چاہئے۔ پچھلے دو سال میں ہمارے بچوں کا جو نقصان ہوا وہ ناقابل تصور اور ناقابل تلافی ہے۔‘
For all the inquirers whether Schools are closing or NOT? In my opinion, every other activity specially Social activity has to be stopped before schools. Schools should be the absolute last in line to close. The learning losses of our children in the past 2 years - Unimaginable.
— Murad Raas (@DrMuradPTI) January 13, 2022
دوسری جانب کورونا کے نئے ویرئنٹ اومی کرون کے کیسز تیزی سے بڑھنے پر سکولوں کو بند کرنے یا کھولنے سے متعلق فیصلہ کرنے کیلئے بین الصوبائی وزرائے تعلیم کا اجلاس ملتوی کردیا گیا ہے۔
وزارت تعلیم کی جانب سے جاری نوٹیفکیشن میں بتایا گیا ہے کہ بین الصوبائی وزرائے تعلیم کا اجلاس اب آئندہ ہفتے بلایا جائے گا جس میں سکولوں کو بند کرنے یا کھولنے کے حوالے سے فیصلہ کیا جائے گا۔
واضح رہے کہ گزشتہ روز وزارت تعلیم کی طرف سے وزرائے تعلیم کا اجلاس آج 11 بجے بلایا گیا تھا تاہم اب بغیر کوئی وجہ بتائے اجلاس کو ملتوی کردیا گیا ہے۔
