کراچی : پاکستان بھر میں آج شب برأت عقیدت و احترام کے ساتھ منائی جائے گی۔ اس بابرکت رات کی مناسبت سے مختلف محافل کا انعقاد کیا جائے گا اور مسلمان رات بھر عبادات اور نفل ادا کریں گے۔ اس رات کو خاص طور پر اللہ کی مغفرت اور رحمت کا دروازہ کھلتا ہے، اور مسلمان اپنے گناہوں کی بخشش اور دعاؤں کے لئے اللہ کے حضور پیش ہوں گے۔
شب برأت کی رات کی فضلیت پر مختلف علماء کرام اور مقررین ملک بھر کی مساجد میں تقریریں کریں گے اور اس رات کی اہمیت کو اجاگر کریں گے۔ لوگ اس بابرکت موقع پر اپنے پیاروں کی قبروں پر فاتحہ خوانی بھی کریں گے۔
شعبان المعظم کا مہینہ برکتوں سے بھرا ہوا ہے، اور اس کی 15 ویں رات یعنی شب برات کو خاص اہمیت حاصل ہے۔ "شب" کا مطلب رات اور "برات" کا مطلب چھٹکارہ ہے۔ اس رات کو اللہ کی رحمتوں اور مغفرت کا خاص موقع سمجھا جاتا ہے، جب اللہ تعالیٰ اپنے بندوں کو بے شمار بخشش دیتا ہے۔ روایات کے مطابق اس رات اللہ تعالیٰ قبیلہ بنوقلب کی بکریوں کے بالوں کی تعداد سے بھی زیادہ گناہ گاروں کی مغفرت فرماتا ہے۔
اس رات کائنات کے تمام امور جیسے عروج و زوال، کامیابی و ناکامی، رزق میں کشادگی یا تنگی کی فہرست مرتب کی جاتی ہے اور فرشتوں کو ان کے کام تفویض کیے جاتے ہیں۔ مسلمان اس رات کو خصوصی عبادات میں مشغول رہتے ہیں، خاص طور پر نماز مغرب کے بعد چھ نفل ادا کیے جائیں گے۔ اس رات مسلمان اللہ کے حضور توبہ کرتے ہیں اور اپنے گناہوں کی بخشش، ایمان، رزق کی کشادگی اور پاکستان سمیت عالم اسلام کی سلامتی کے لئے دعائیں کرتے ہیں۔
اللہ تعالیٰ اس رات بندوں کو اپنی بے شمار رحمتوں سے فائدہ اٹھانے کا موقع دیتا ہے تاکہ وہ اپنی زندگیوں میں بہتری کے لئے دعا کریں اور روحانی سکون حاصل کریں۔ شب برات ایک ایسا موقع ہے جب بندے اللہ کی قربت اور رحمت کی طلب میں محنت کرتے ہیں۔
