اسلام آباد : ترکیہ کے صدر رجب طیب اردوان پاکستان کے دو روزہ دورے پر پہنچے، جہاں ان کا شاندار استقبال کیا گیا۔ وزیراعظم ہاؤس پہنچنے پر وزیراعظم شہباز شریف نے ترک صدر کا فقید المثال استقبال کیا اور مہمان صدر کے اعزاز میں پروقار استقبالیہ تقریب کا انعقاد کیا۔
اس دوران، شاہراہ دستور کو ترکیہ اور پاکستانی پرچموں سے سجایا گیا، اور گلگت بلتستان، آزاد کشمیر اور چاروں صوبوں کے روایتی رقص کا مظاہرہ بھی کیا گیا۔ وزیراعظم شہباز شریف اور صدر اردوان کے درمیان روایتی انداز میں مصافحہ ہوا اور خوشگوار جملوں کا تبادلہ کیا گیا۔ مہمان صدر کو سلامی کے چبوترے پر لایا گیا جہاں دونوں ممالک کے ترانے بجائے گئے، بعد ازاں ترک صدر کو مسلح افواج کے دستے کی جانب سے گارڈ آف آنر پیش کیا گیا۔
اس موقع پر آرمی چیف جنرل عاصم منیر نے بھی ترک صدر سے مصافحہ کیا۔ وزیراعظم نے ترک صدر کو فرداً فرداً کابینہ اراکین سے تعارف کرایا اور ترک صدر کے ہمراہ آئے وفد سے بھی مصافحہ کیا۔ ترک صدر رجب طیب اردوان نے وزیراعظم ہاؤس کے احاطے میں پودا لگایا اور دونوں ممالک کے استحکام، سلامتی اور پاک ترک تعلقات کے فروغ کے لیے دعا کی۔
ترک صدر کے اعزاز میں پاک فضائیہ کی جانب سے ایف 16 طیاروں کی فارمیشن کا خصوصی فلائی پاسٹ بھی پیش کیا گیا جس نے معزز مہمان کو سلامی دی۔ یہ دورہ پاکستان اور ترکیہ کے تعلقات کو مزید مستحکم کرنے میں اہم کردار ادا کرے گا۔
