راولپنڈی :پاکستان سپر لیگ کے دسویں ایڈیشن کے چوتھے میچ میں لاہور قلندرز نے کوئٹہ گلیڈی ایٹرز کو جیت کے لیے 220 رنز کا ہدف دیا ہے۔
راولپنڈی کرکٹ اسٹیڈیم میں کھیلے گئے اس میچ میں لاہور قلندرز نے پہلے بیٹنگ کرتے ہوئے 20 اوورز میں 6 وکٹوں کے نقصان پر 219 رنز بنائے۔
لاہور قلندرز کی بیٹنگ: میچ سے قبل کوئٹہ گلیڈی ایٹرز کے کپتان سعود شکیل نے ٹاس جیت کر لاہور قلندرز کو پہلے بیٹنگ کی دعوت دی۔
لاہور قلندرز کی طرف سے فخر زمان کے ساتھ اننگز کا آغاز کرنے والے محمد نعیم صرف 10 رنز بنا کر پویلین لوٹ گئے۔ تاہم عبداللہ شفیق نے 37 رنز کی جارحانہ اننگز کھیل کر اسٹرائیک مستحکم کیا۔
فخر زمان نے اپنی نصف سینچری مکمل کی اور 39 گیندوں پر 67 رنز بنا کر آؤٹ ہوئے، جن میں 3 چھکے اور 7 چوکے شامل تھے۔ اس کے بعد ڈیرل مچل 37 رنز، سکندر رضا 6 رنز اور کپتان شاہین آفریدی 3 رنز بنا کر آؤٹ ہوئے۔
لاہور قلندرز کے وکٹ کیپر بلے باز سیم بلنگز نے آخری اوورز میں جارحانہ کھیل کا مظاہرہ کیا اور 19 گیندوں پر 50 رنز بنا کر ناٹ آؤٹ رہے، جس سے ٹیم کا ٹوٹل مزید مستحکم ہو گیا۔
کوئٹہ گلیڈی ایٹرز کی باؤلنگ: کوئٹہ گلیڈی ایٹرز کی جانب سے عقیل حسین اور ابرار احمد نے 2،2 وکٹیں حاصل کیں، جب کہ فہیم اشرف اور عثمان طارق نے ایک ایک وکٹ لی۔
یاد رہے کہ کوئٹہ گلیڈی ایٹرز نے اپنے پہلے میچ میں پشاور زلمی کو 80 رنز سے شکست دی تھی، جبکہ لاہور قلندرز کو اسلام آباد یونائیٹڈ کے ہاتھوں شکست کا سامنا کرنا پڑا تھا۔