بیجنگ: چین نے امریکہ سے مطالبہ کیا ہے کہ وہ اپنی جوابی ٹیرف پالیسی کو مکمل طور پر ختم کرے۔ چینی وزارت تجارت کے ترجمان نے ایک بیان میں کہا کہ چین نے امریکہ سے درخواست کی ہے کہ وہ اپنی غلطیوں کو درست کرنے کے لیے بڑا قدم اٹھائے اور جوابی ٹیرف جیسے غلط اقدامات کو مکمل طور پر ختم کرے تاکہ دونوں ممالک باہمی احترام کے راستے پر واپس آ سکیں۔
یہ بیان امریکی کسٹمز اینڈ بارڈر پروٹیکشن آفس کی جانب سے جاری کردہ نوٹس کے بعد سامنے آیا، جس میں اسمارٹ فونز، لیپ ٹاپس، میموری چپس اور دیگر مصنوعات کو ان ٹیرف سے استثنیٰ دیا گیا ہے جو صدر ڈونلڈ ٹرمپ کی جانب سے رواں ماہ نافذ کیے گئے تھے۔
چینی وزارت تجارت نے اس بات کا بھی ذکر کیا کہ امریکہ کا الیکٹرانک مصنوعات کو ٹیرف سے استثنیٰ دینا ایک چھوٹا قدم ہے، اور چین اس فیصلے کے اثرات کا جائزہ لے رہا ہے۔ اس استثنیٰ کا فائدہ امریکی ٹیکنالوجی کمپنیوں جیسے ڈیل، اینویڈیا، اور ایپل کو ہوگا، جو اپنی مصنوعات کی تیاری کے لیے چین پر انحصار کرتی ہیں۔
واضح رہے کہ بیشتر چینی مصنوعات پر امریکہ کی جانب سے بدستور 145 فیصد ٹیرف عائد ہے، جبکہ چین نے بھی امریکہ کی مصنوعات پر 125 فیصد ٹیرف عائد کر رکھا ہے۔
