اسلام آباد: وزیراعظم عمران خان کا کہنا ہے کہ ہم ہر طرح کی رکاوٹ دور کریں گے تاکہ ترسیلات زر میں اضافہ ہو سکے۔سماجی رابطے کی ویب سائٹ ٹویٹر پر اظہار خیال کرتے ہوئے وزیراعظم عمران خان کا کہنا تھا کہ سمندر پار پاکستانیوں سے تفصیلی ملاقات ہوئی۔ ہم سمندر پار پاکستانیوں کے لیے خصوصی مراعات کے پیکج کا اعلان کر رہے ہیں اور بینکوں کے ذریعہ رقم بھیجنے کے لئے ان کی حوصلہ افزائی کے لئے خصوصی پیکج متعارف کریں گے۔ ہماری حکومت اوورسیز پاکستانیوں کے اثاثوں اور جائیدادوں کا قبضہ مافیا سے مکمل تحفظ بھی یقینی بنائے گی۔
وزیراعظم نے کہا کہ اوورسیز پاکستانیوں کی ترسیلات زر بینکوں سے بھیجنے کی حوصلہ افزائی کی جائے گی اور انتظامی معاملات میں رکاوٹوں کو دور کریں گے تاکہ ترسیلاتِ زر میں اضافہ ہو۔ اس طرح کے اقدام سے ترسیلاتِ زر میں 20 ارب سے 40 ارب ڈالر تک اضافہ ہو سکتا ہے۔
ان کا کہنا تھا کہ فلپائن کی مثال ہمارے سامنے ہے اور وہاں اسی طریقے سے معیشت بہتر بنائی گئی۔ فلپائن نے اس اقدام کو کامیابی سے سرانجام دیا۔