دیامر : گلگت بلتستان کے ضلع دیامر میں ایک دل دہلا دینے والا حادثہ پیش آیا ہے جس میں باراتیوں سے بھری کوسٹر دریا میں جاگری ہے۔
حادثے کے نتیجے میں 2 افراد جاں بحق جبکہ 22 افراد لاپتہ ہو گئے ہیں۔ ریسکیو ٹیموں نے فوری طور پر امدادی کارروائیاں شروع کر دی ہیں۔
تفصیلات کے مطابق، کوسٹر گلگت بلتستان کے ضلع استور کے گاؤں پریشنگ سے راولپنڈی کے لیے روانہ ہوئی تھی کہ دیامر کی حدود میں حادثہ پیش آیا اور کوسٹر دریا میں گر گئی۔
حادثے کی اطلاع ملتے ہی ریسکیو ٹیمیں اور ایمبولنسیں جائے حادثہ پر پہنچ گئیں۔اب تک امدادی ٹیموں نے 2 لاشیں برآمد کی ہیں، جبکہ ایک زخمی لڑکی کو ہسپتال منتقل کر دیا گیا ہے۔ لاپتہ افراد کی تلاش جاری ہے۔ ذرائع کے مطابق، کوسٹر میں کل 25 افراد سوار تھے۔
