اسلام آباد: وزیراعظم شہباز شریف کے کل کوئٹہ کے ایک روزہ دورے کا امکان ہے، جہاں وہ امن و امان کی صورتحال پر اجلاس کی صدارت کریں گے۔
ذرائع کے مطابق، وزیراعظم کو جعفر ایکسپریس پر دہشت گرد حملے کے حوالے سے تفصیلی بریفنگ دی جائے گی، جبکہ دہشت گردوں سے نمٹنے کے لیے اہم فیصلے بھی متوقع ہیں۔
اس سے قبل، وزیراعظم نے وزیراعلیٰ بلوچستان سرفراز بگٹی سے ٹیلیفونک گفتگو میں حملے کی تازہ ترین صورتحال دریافت کی۔ شہباز شریف نے کہا کہ "پوری قوم اس گھناؤنے فعل پر شدید صدمے میں ہے اور معصوم جانوں کے ضیاع پر غمزدہ ہے۔"
وزیراعظم نے شہداء کے اہل خانہ سے دلی تعزیت کا اظہار کرتے ہوئے کہا کہ "ایسی بزدلانہ کارروائیاں پاکستان کے امن کے عزم کو متزلزل نہیں کر سکتیں۔" انہوں نے شہداء کے درجات کی بلندی اور زخمیوں کی جلد صحتیابی کی دعا بھی کی۔
مزید برآں، وزیراعظم نے بتایا کہ آپریشن کے دوران درجنوں دہشت گردوں کو ہلاک کر دیا گیا ہے، اور امن و امان کی بحالی کے لیے تمام ممکنہ اقدامات کیے جا رہے ہیں۔
