اوسلو : ناروے کی روبوٹکس کمپنی 1X نے حال ہی میں ایک جدید بائی پیڈل ہیومنائیڈ روبوٹ نیو گاما متعارف کرایا ہے، جو مصنوعی ذہانت (AI) سے چلتا ہے اور گھر کے متعدد کام انجام دینے کی صلاحیت رکھتا ہے۔
یہ روبوٹ روزمرہ کے گھریلو کاموں جیسے کپڑے دھونا، کھڑکیوں کی صفائی، ویکیومنگ اور دیگر کاموں کو انجام دے سکتا ہے، جو کہ گھریلو امور میں روبوٹ کی کمی کو پورا کرنے کی ایک اہم پیشرفت ہے۔ حالیہ برسوں میں روبوٹکس میں کچھ اہم پیش رفتیں سامنے آئی ہیں، جیسے STAR1 جو دنیا کا تیز ترین بائی پیڈل روبوٹ ہے اور SE01 جو صفائی کے کام کے لیے معروف ہے۔ تاہم، ان میں سے زیادہ تر روبوٹ خاص طور پر صنعتی یا خصوصی کاموں کے لیے تھے، اور گھریلو کاموں کے لیے روبوٹ کی کمی محسوس کی جارہی تھی۔
نیو گاما اس کمی کو پورا کرنے کے لیے ایک انقلابی قدم ہے، جو کہ انسان نما روبوٹ کی شکل میں گھر کے روزمرہ کے کاموں میں مددگار ثابت ہوگا۔ نیو گاما کی انسان نما شکل کو مزید حقیقت پسند بنانے کے لیے، جاپانی کمپنی شیما سیکی کے ساتھ مل کر ایک نرم اور ہموار سوٹ تیار کیا گیا ہے تاکہ روبوٹ کے دھاتی جسم کو چھپایا جا سکے اور یہ زیادہ قدرتی اور دلکش نظر آئے۔ اس جدید ٹیکنالوجی کے ساتھ، یہ روبوٹ مستقبل میں گھریلو کاموں کو انجام دینے میں اہم کردار ادا کرے گا اور صارفین کے لیے زندگی کو مزید آسان بنانے کا ذریعہ بنے گا۔
