لاہور : محکمہ موسمیات نے ملک کے مختلف حصوں میں تیز ہواؤں اور گرج چمک کے ساتھ بارش کی پیشگوئی کی ہے۔ خیبرپختونخوا، کشمیر، گلگت بلتستان، شمالی بلوچستان اور بالائی پنجاب میں تیز ہواؤں اور گرج چمک کے ساتھ بارش اور پہاڑوں پر برفباری کا امکان ظاہر کیا گیا ہے۔ دیگر علاقوں میں مطلع جزوی طور پر ابرآلود رہنے کا امکان ہے۔
چلاس شہر اور اس کے گرد و نواح میں ہلکی بارش کا سلسلہ جاری ہے، جبکہ دیامر کے دورافتادہ اور مضافاتی علاقوں میں بارش اور برفباری کا سلسلہ بھی جاری ہے۔ بابوسر ٹاپ، بٹوگاہ ٹاپ، نانگا پربت، دیامر اور کوہستان میں بارشوں کا سلسلہ دوبارہ شروع ہو چکا ہے، جو کہ چند دنوں کی رکاوٹ کے بعد دوبارہ فعال ہو گیا ہے۔
پولیس نے مسافروں کو غیر ضروری سفر سے اجتناب کرنے کی ہدایت کی ہے، کیونکہ وادی لیپہ ریشیاں روڈ بارش، برف باری اور گلیشیئر گرنے کی وجہ سے بند ہے۔ محکمہ شاہرات کی تین مشینیں، پاک فوج کے تعاون سے، روڈ کو کلیئر کرنے میں مصروف ہیں۔
