لاہور: چیئرمین پاکستان کرکٹ بورڈ (پی سی بی) محسن نقوی نے قذافی سٹیڈیم کا اچانک دورہ کیا اور وہاں جاری تعمیراتی کاموں پر پیشرفت کا جائزہ لیا۔ اس دوران انہوں نے مرکزی عمارت کے فنشنگ کے کاموں کا معائنہ کیا اور فنشنگ ورک کو جلد مکمل کرنے کی ہدایت کی۔ محسن نقوی نے پراجیکٹ پر ہونے والی پیشرفت پر اطمینان کا اظہار کیا۔
چیئرمین پی سی بی محسن نقوی نے اس موقع پر گفتگو کرتے ہوئے کہا کہ ڈرینج ورک کو بھی مقررہ مدت میں مکمل کیا جائے اور جدید سہولتوں سے آراستہ قذافی سٹیڈیم رواں ماہ مکمل ہو جائے گا۔ انہوں نے مزید بتایا کہ چیمپئنز ٹرافی ٹورنامنٹ کے لیے سٹیڈیم کی تعمیر نو کا کام تیزی سے جاری ہے۔
محسن نقوی نے مزید کہا کہ شائقین کرکٹ کے لیے نئی کرسیاں اور ایل ای ڈی لائٹس لگائی جا رہی ہیں، تاکہ وہ میچ کے دوران نہ صرف کرکٹ سے محظوظ ہوں بلکہ لیزر لائٹ شو سے بھی لطف اندوز ہو سکیں۔ اس کے علاوہ، نئی سکور سکرینز کی تنصیب کا کام بھی جاری ہے۔ چیئرمین پی سی بی نے یقین دہانی کرائی کہ پی سی بی چیمپئنز ٹرافی کو ایک یادگار ایونٹ بنانے کے لیے مکمل طور پر تیار ہے۔