بھارت میں مزاحیہ شادی کارڈ کی انفرادیت، سوشل میڈیا پر وائرل

نئی دہلی: بھارت میں ایک دلچسپ اور منفرد شادی کارڈ سوشل میڈیا پر وائرل ہوگیا ہے، جس میں شادی کی عام روایات اور بعض مخصوص رویوں کا مزاحیہ انداز میں تذکرہ کیا گیا ہے۔

اس کارڈ میں دلہن کو "شرما جی کی لڑکی" اور دلہا کو "گوپال جی کا لڑکا" کہا گیا ہے، اور دونوں کی کامیابیوں کو ہنسی مذاق کے انداز میں بیان کیا گیا ہے۔ دلہن کے بارے میں بتایا گیا کہ وہ "پڑھائی میں تیز" ہے، اور دلہا نے "بی ٹیک کرنے کے بعد دکان سنبھال لی ہے"۔

دعوت نامے میں شادی کی تاریخ کو ایک "مقدس دن" کے طور پر پیش کیا گیا ہے، جسے تین پنڈتوں نے تجویز کیا، اور اس دن ٹنکو (گھر کے بچے) کے امتحانات بھی ختم ہو رہے ہیں، جو اس دن کو شادی کے لیے بہترین بناتا ہے۔

مزید برآں، اس دعوت نامے میں مہمانوں سے کہا گیا ہے کہ وہ اس لیے ضرور آئیں کہ "اگر آپ نہ آئے تو پھر کھانے کی برائی کون کرے گا؟"۔ شادی کے مقام کا ذکر بھی دلچسپ انداز میں کیا گیا، جہاں گیٹ کو "کنفیوز کرنے والا" کہا گیا ہے، جو ہر ہال میں ایک جیسا لگتا ہے۔

یہ دعوت نامہ شادی کے بعد کی تقریب یعنی "ریسیپشن" کے بارے میں بھی کچھ مزاحیہ ہدایات دیتا ہے، اور مہمانوں کو یہ بھی کہا گیا ہے کہ "کھانا کھا کر جائیں لیکن ایک ہی پلیٹ لے کر" کیونکہ کھانے کا ریٹ فی پلیٹ 2 ہزار روپے ہے۔

اس کے ساتھ ہی کارڈ میں مہمانوں سے کہا گیا ہے کہ وہ اپنی ہدایات کے مطابق تحائف نہ لائیں، بلکہ "کیش" دیں، کیونکہ جو تحائف پہلے ہی مل چکے ہیں، وہ کافی ہیں۔