لندن: برطانوی ماہرین صحت نے کہا ہے کہ سرسبز اور درختوں والے مقامات پر چہل قدمی سے دماغی صلاحیت بہتر ہوتی ہے ۔
یارک یونیورسٹی اور یونیورسٹی آف ایڈنبرا کے ماہرین کی جانب سے کی گئے مشترکہ سروے کے مطابق عمررسیدہ افراد اگر زیادہ وقت سرسبز و شاداب مقامات پر گزاریں تو ان کی دماغی صلاحیت اور مزاج پر گہرے مثبت اثرات مرتب ہوتے ہیں۔ماہرین نے اس منصوبے کے تحت درجنوں افراد کو سروے میں شامل کیا۔
تجربے میں بزرگ اور عمررسیدہ خواتین و حضرات کو شہری ماحول اور سبز ماحول سے گزرنے کو کہا گیا اور اس دوران الیکٹرو اینسیفیلوگراف سے ان کی دماغی کیفیات نوٹ کی گئیں۔ اس میں 65 سال سے زائد عمر کے 95 لوگوں کے سروں پر ای ای جی آلہ لگا کر انہیں مصروف شہری ماحول اور سبزہ بھرے راستوں سے گزرنے کو کہا گیا۔
اس دوران ان افراد کی ویڈیو بھی بنائی گئی اور شرکا سے کہا گیا کہ وہ اس سفرمیں اپنے تاثرات بھی بیان کرتے رہیں، سروے سے پہلے اور بعد میں ان سے سوالات بھی کیے گئے۔ ماہرین کا کہنا ہے کہا تمام شرکا نے پرسکون اور سبز راستوں کو پسند کیا جبکہ پرہجوم شہری جگہوں سے انہیں الجھن کا سامنا کرنا پڑا۔
تحقیق کے سربراہ کا کہنا ہے کہ شہر پھیلتے جارہے ہیں اور بزرگ افراد کی تعداد بڑھتی جارہی ہے اس لیے ضروری ہے کہ شہری علاقوں کو کسی نہ کسی طرح سرسبز و شاداب رکھا جائے تاکہ لوگ وہاں سے ذہنی سکون حاصل کرسکیں کیو نکہ یہ کم خرچ میں دماغی بیماریوں کو کم کرنے کا ایک بہترین نسخہ ہے۔
