لاہور: ملک بھر میں کنٹونمنٹ بورڈز کے انتخابات کل ہوں گے اور ملک کے 41 کنٹونمنٹ بورڈز کے 206 وارڈز میں 1560 امیدوار میدان میں ہیں۔
کنٹونمنٹ بورڈز الیکشن میں حصہ لینے والے 7 امیدوار بلا مقابلہ منتخب ہو چکے ہیں جب کہ کامرہ کنٹونمنٹ بورڈ میں انتخاب نہیں ہو رہا۔ راولپنڈی اور پنوں عاقل کے ایک، ایک وارڈ میں بھی انتخاب ملتوی ہو چکا ہے۔
کنٹونمنٹ بورڈز کے الیکشن میں سب سے زیادہ تعداد آزاد امیدواروں کی ہے اور ملک بھر سے 684 آزاد امیدوار میدان میں ہیں اور سیاسی جماعتوں کے 876 امیدوار میدان میں ہیں۔
سب سے زیادہ تعداد پاکستان تحریک انصاف کے امیدواروں کی ہے جو 183 ہے، پاکستان مسلم لیگ ن کے 144، پاکستان پیپلز پارٹی کے 113 اور جماعت اسلامی کے 104 امیدوار میدان میں ہیں ۔
کالعدم تحریک لبیک پاکستان کے 83 امیدوار بھی الیکشن لڑ رہے ہیں اور متحدہ قومی موومنٹ کے 42، پاک سرزمین پارٹی کے 35، مسلم لیگ ق کے 34 اور جے یو آئی ف کے 25 امیدوار الیکشن لڑ رہے ہیں۔
