لاہور : معروف اداکارہ لائبہ خان نے ماضی میں اپنی شادی کے بارے میں پھیلائی جانے والی افواہوں کی حقیقت بیان کی ہے۔
اداکارہ نے حال ہی میں ایک فیشن برانڈ کو دیے گئے انٹرویو میں اس بات کا انکشاف کیا کہ یوٹیوب اور دیگر پلیٹ فارمز پر یہ جھوٹی خبریں گردش کر رہی تھیں کہ انہوں نے 50 سالہ قطری شہزادے سے شادی کر لی ہے، کیونکہ اس شخص کے پاس پیسہ بہت تھا۔
لائبہ خان نے کہا کہ یہ خبریں نہ صرف سوشل میڈیا پر بلکہ یوٹیوب پر بھی پھیلائی گئیں جس سے ان کے والد بھی پریشان ہوگئے تھے۔ انہوں نے بتایا کہ جب ان کے والد نے یہ خبر سنی تو وہ بہت فکرمند ہوئے اور سوال کیا کہ کیا یہ سچ ہے؟ جس پر لائبہ خان نے انہیں یقین دلایا کہ ایسا کچھ بھی نہیں ہے اور یہ تمام افواہیں جھوٹ ہیں۔
اداکارہ نے اپنی شخصیت اور رویے کے بارے میں بات کرتے ہوئے کہا کہ وہ خوشبو سے متاثر ہو کر لوگوں کے ساتھ فوراً دوستی کر لیتی ہیں، اور اگر کسی نے خوشبو نہ لگائی ہو تو وہ پہلے اس کے پاؤں دیکھتی ہیں، پھر اس کی شخصیت اور دوستی کے بارے میں فیصلہ کرتی ہیں۔
انہوں نے یہ بھی کہا کہ وہ بہت ضدی طبیعت کی مالک ہیں اور اگر انہیں کوئی چیز یا شخص پسند آجائے تو وہ اسے اپنی ہی سمجھتی ہیں۔ لائبہ خان نے اپنی ذاتی زندگی کے بارے میں بات کرتے ہوئے ان افواہوں کی حقیقت کو واضح کیا اور کہا کہ ان کے ساتھ ایسی کوئی بات نہیں ہوئی تھی۔