لاہور: دورہ نیوزی لینڈ کیلئے قومی ٹیم کے کھلاڑیوں کا اعلان کر دیا گیا ہے۔ ٹیم میں نوجوان کھلاڑیوں خوشدل شاہ اور روحیل نذیر سمیت دیگر کو شامل کیا گیا ہے۔
اس بات کا اعلان قومی ٹیم کے چیف سلیکٹر مصباح الحق نے لاہور میں ایک پریس کانفرنس کے دوران کیا۔ ان کا کہنا تھا کہ کسی کھلاڑی کے لیے دروازے بند نہیں ہوتے، کسی کے نام پر فل سٹاپ نہیں ہے۔ میں نہیں سمجھتا کہ حالیہ فیصلے پیٹرن سے ہونے والی ملاقات کا نتیجہ ہے۔ ڈومیسٹک پرفارمرز کے نام اس فہرست میں شامل نہیں تھے جو نیوزی لینڈ بھیجے گئے۔ چیف سلیکٹر نے کہا کہ بابراعظم ہمارا مین بیٹسمین ہے، وہ ذمہ داری لے رہا ہے۔
انہوں نے بتایا کہ وکٹ کیپرز میں محمد رضوان، سرفراز احمد اور روحیل نذیر کو منتخب کیا گیا ہے۔ فاسٹ بولرز میں عماد بٹ، فہیم اشرف، حارث رؤف، محمد عباس، محمد حسنین اور محمد موسیٰ شامل ہیں جبکہ پانچ سپنرز کو بھی نیوزی لینڈ بھیج رہے ہیں۔ عماد وسیم، شاداب خان، عثمان قادر، یاسر شاہ اور ظفر گوہر کو بھی ٹیم کا حصہ بنایا گیا ہے۔
ان کا کہنا تھا کہ خوشدل شاہ، عابد علی، عبداللہ شفیق، فخر زمان، امام الحق، شان مسعود، ذیشان ملک بطور اوپنر منتخب ہوئے ہیں جبکہ بولرز نسیم شاہ، شاہین شاہ آفریدی، سہیل خان اور وہاب ریاض بھی نیوزی لینڈ جائیں گے۔
