اسلام آباد: ڈسٹرکٹ اینڈ سیشن کورٹس اسلام آباد نے پی ٹی آئی کے رہنماؤں کے وارنٹ گرفتاری جاری کر دیے ہیں، جو حقیقی آزادی مارچ کیسز میں ملوث ہیں۔
سینئر سول جج محمد عباس شاہ نے پی ٹی آئی کے حقیقی آزادی مارچ پر درج دو کیسز کی سماعت کی۔ مقدمے میں نامزد کسی بھی ملزم کی عدالت میں پیشی نہ ہونے پر، علی نواز اعوان، راجا خرم نواز اور دیگر کے وارنٹ گرفتاری جاری کر دیے گئے۔ دونوں مقدمات میں بانی پی ٹی آئی عمران خان اور دیگر افراد بھی نامزد ہیں۔
عدالت میں ملزمان کی بریت کی درخواست پر آج بھی دلائل نہیں ہو سکے۔ جج محمد عباس شاہ نے کہا کہ ملزمان کی موجودگی میں ہی بریت کی درخواستوں پر سماعت کی جائے گی۔ وکیل درخواست گزار نے موقف اختیار کیا کہ اس سے قبل کئی کیسز میں بانی پی ٹی آئی کی غیر موجودگی میں دلائل ہو چکے ہیں اور وہ بری ہو گئے ہیں۔
عدالت نے دونوں کیسز کی سماعت 23 اپریل تک ملتوی کر دی ہے۔ ان مقدمات میں بانی پی ٹی آئی سمیت دیگر افراد کے خلاف تھانہ کوہسار میں دو کیسز درج ہیں۔
