لاہور: لاہور ہائیکورٹ میں سوشل میڈیا پلیٹ فارمز یوٹیوب، فیس بک، انسٹاگرام اور ٹک ٹاک پر فوری پابندی عائد کرنے کے لیے درخواست دائر کر دی گئی ہے۔ درخواست گزار نے وفاقی حکومت اور پاکستان ٹیلی کمیونیکیشن اتھارٹی (پی ٹی اے) کو فریق بنایا ہے۔
درخواست میں موقف اختیار کیا گیا ہے کہ پاکستان میں یوٹیوب چینلز کو بلیک میلنگ اور غیر اخلاقی مقاصد کے لیے استعمال کیا جا رہا ہے۔ درخواست گزار کے مطابق، غیر اخلاقی ویڈیوز اپ لوڈ کرکے ویوز اور آمدنی حاصل کی جا رہی ہے، جبکہ ان پلیٹ فارمز پر بغیر لائسنس کے کسی بھی قسم کی ویڈیو اپ لوڈ کی جا سکتی ہے۔
مزید کہا گیا ہے کہ سوشل میڈیا پر جعلی ویڈیوز کا سلسلہ بھی جاری ہے، اور یوٹیوبرز اپنے ولاگز میں خواتین کو دکھا کر خاندانی نظام کو نقصان پہنچا رہے ہیں۔ درخواست میں عدالت سے استدعا کی گئی ہے کہ وہ سٹیزن پروٹیکشن رولز پر عملدرآمد یقینی بنائے اور سوشل میڈیا کے تمام پلیٹ فارمز پر پابندی عائد کرنے کے احکامات جاری کرے۔
یہ درخواست ایک ایسے وقت میں سامنے آئی ہے جب سوشل میڈیا کے استعمال اور اس کے اثرات پر مختلف حلقوں میں بحث جاری ہے۔ لاہور ہائیکورٹ میں اس درخواست پر سماعت آئندہ دنوں میں متوقع ہے۔
