اسلام آباد: عالمی مالیاتی فنڈ (آئی ایم ایف) کے چھ رکنی وفد نے چیف جسٹس آف پاکستان یحییٰ آفریدی سے سپریم کورٹ میں ملاقات کی۔ یہ ملاقات تقریباً ایک گھنٹے تک جاری رہی، جس دوران چیف جسٹس نے وفد کو پاکستان کے عدالتی نظام اور اصلاحات کے بارے میں بریفنگ دی۔
ملاقات کے دوران ججز کی تقرری اور آئینی ترامیم پر بھی گفتگو ہوئی۔ ذرائع کے مطابق، ملاقات کے بعد آئی ایم ایف کے وفد نے سپریم کورٹ سے روانہ ہونے سے قبل مزید بات چیت کی۔
یاد رہے کہ آئی ایم ایف کا وفد پاکستان کے دورے پر ہے، اور اس سے قبل آئی ایم ایف کے تکنیکی وفد نے کابینہ ڈویژن، پی ایم آفس، وزارت خزانہ اور وزارت قانون میں ملاقاتیں کیں۔ ان ملاقاتوں میں آئی ایم ایف نے سرکاری افسران کے اثاثوں کی ڈیکلریشن کے لیے مزید مہلت کی درخواست مسترد کر دی۔
دوسری جانب ذرائع نے بتایا ہے کہ سرکاری افسران کے اثاثوں کو ڈیکلئیر کرنے کے لیے قانونی مسودے پر مشاورت کا آغاز ہو چکا ہے، اور اس ترمیمی ڈرافٹ کو فروری میں آئی ایم ایف کو فراہم کیا جائے گا۔