گوئٹے مالا : وسطی امریکی ملک گوئٹے مالا میں ایک خوفناک ٹریفک حادثہ پیش آیا، جس میں کم از کم 55 افراد ہلاک اور متعدد زخمی ہوگئے۔ غیر ملکی خبر رساں ایجنسی کے مطابق، پیر کے روز ایک مسافر بس پل کے حفاظتی جنگلے کو توڑتے ہوئے 20 میٹر گہری کھائی میں جا گری۔
حادثے کے نتیجے میں ہلاک ہونے والوں میں 36 مرد اور 15 خواتین شامل ہیں۔ بس میں تقریباً 75 افراد سوار تھے، اور زخمی ہونے والوں کو فوری طور پر مختلف اسپتالوں میں منتقل کیا گیا، جن میں سے کئی کی حالت تشویشناک بتائی جارہی ہے۔ فائر ڈپارٹمنٹ کے مطابق، بس کا ڈرائیور کنٹرول کھو بیٹھا تھا اور بس کئی چھوٹی گاڑیوں سے ٹکرا کر کھائی میں جا گری۔ یہ حادثہ گوئٹے مالا میں حالیہ برسوں کا بدترین ٹریفک حادثہ قرار دیا جا رہا ہے۔
گوئٹے مالا کے صدر نے اس سانحے پر گہرے افسوس کا اظہار کرتے ہوئے قومی سوگ کا اعلان کیا ہے۔ وزیر مواصلات کے مطابق، بس 30 سال پرانی تھی، لیکن اس کو ابھی تک سڑک پر چلنے کی اجازت حاصل تھی۔ حکام اس بات کی تحقیقات کر رہے ہیں کہ آیا بس میں ضرورت سے زیادہ مسافر سوار تھے۔ پبلک پراسیکیوٹر آفس نے حادثے کی تحقیقات کا آغاز کر دیا ہے تاکہ حادثے کی اصل وجہ کا پتہ چلایا جا سکے۔