اسلام آباد : وزیراعظم پاکستان شہباز شریف نے لیبیا کے ساحل پر کشتی کے حادثے میں جاں بحق ہونے والے پاکستانیوں کے لیے گہرے دکھ اور افسوس کا اظہار کیا ہے۔ وزیراعظم نے حادثے میں جاں بحق ہونے والے افراد کے لواحقین سے تعزیت کرتے ہوئے ان کی بلندی درجات کے لیے دعا بھی کی۔
وزیراعظم نے متعلقہ حکام سے واقعے کی رپورٹ طلب کرتے ہوئے وزارت خارجہ کے حکام کو ہدایت دی کہ وہ جاں بحق پاکستانیوں کی شناخت جلد مکمل کریں اور متاثرہ افراد کو ہر ممکن امداد فراہم کریں۔ انہوں نے کہا کہ انسانی سمگلنگ جیسے مکروہ عمل میں ملوث افراد کے خلاف سخت کارروائی کی جائے گی اور اس سلسلے میں کسی بھی قسم کی کوتاہی برداشت نہیں ہو گی۔
شہباز شریف نے اس بات کا عزم ظاہر کیا کہ حکومت انسانی سمگلنگ کے خلاف بھرپور اقدامات اٹھا رہی ہے تاکہ ایسے حادثات اور انسانی المیوں سے بچا جا سکے۔
