اسلام آباد: اسلام آباد کی ڈسٹرکٹ اینڈ سیشن کورٹ نے پاکستان تحریک انصاف (پی ٹی آئی) کے بانی عمران خان کی 6 اور بشریٰ بی بی کی ایک مقدمے میں عبوری ضمانت میں 25 فروری تک توسیع کر دی ہے۔
ایڈیشنل سیشن جج محمد افضل مجوکا کی زیرصدارت ہونے والی سماعت میں عمران خان کے وکیل خالد یوسف چوہدری عدالت میں پیش ہوئے۔ دوران سماعت، جیل حکام کی جانب سے عمران خان کی ویڈیو لنک کے ذریعے حاضری پر جواب جمع نہیں کروایا گیا، جس پر جج نے وکلا کو ہدایت کی کہ اگلی سماعت پر اپنے دلائل پیش کریں۔
جج افضل مجوکا نے کہا کہ وہ اسی مہینے ضمانتوں پر فیصلہ کریں گے۔ سماعت کے اختتام پر عدالت نے عمران خان اور بشریٰ بی بی کی ضمانت میں 25 فروری تک توسیع کرتے ہوئے سماعت ملتوی کر دی ہے۔
