واشنگٹن : امریکی صدر ڈونلڈ ٹرمپ نے حماس کی جانب سے اسرائیلی یرغمالیوں کی رہائی غیر معینہ مدت تک ملتوی کرنے کے بعد سخت دھمکی دی ہے۔ ٹرمپ نے کہا کہ اگر ہفتے کے دن دوپہر 12 بجے تک تمام اسرائیلی یرغمالیوں کو رہا نہ کیا گیا تو غزہ میں جاری جنگ بندی معاہدہ ختم کر دیا جائے گا اور صورتحال قابو سے باہر ہو جائے گی۔
ٹرمپ نے میڈیا سے بات کرتے ہوئے کہا کہ اگر یرغمالیوں کو وقت پر رہا نہ کیا گیا تو وہ جنگ بندی معاہدے کو منسوخ کرنے کا اعلان کر دیں گے، جس کے بعد سب کچھ ختم ہو جائے گا۔ انہوں نے مزید کہا کہ غزہ سیز فائر ہفتے کے دن مکمل طور پر ختم ہو جائے گا۔ ٹرمپ نے یہ بھی کہا کہ اردن اور مصر پناہ گزینوں کو قبول کرنے کے لیے تیار ہو سکتے ہیں، اور اگر ان دونوں ممالک نے ایسا نہ کیا تو ان کی مالی امداد بند کی جا سکتی ہے۔
یہ صورت حال اس وقت پیدا ہوئی جب حماس نے اسرائیل کی جانب سے جنگ بندی معاہدے کی خلاف ورزیوں پر یرغمالیوں کی رہائی ملتوی کر دی تھی۔ گزشتہ ماہ قطر، امریکا اور مصر کی ثالثی میں حماس اور اسرائیل کے درمیان جنگ بندی معاہدہ طے پایا تھا، جس کے بعد غزہ میں 15 ماہ سے جاری جنگ کا خاتمہ ہوا تھا۔
