بلوچستان میں میٹرک کے سالانہ امتحانات آج سے شروع

کوئٹہ : بلوچستان میں میٹرک کے سالانہ امتحانات آج سے شروع ہو گئے ہیں، جس میں ایک لاکھ 40 ہزار سے زائد طلبہ حصہ لے رہے ہیں۔ امتحانات 3 مارچ تک جاری رہیں گے، اور آج پہلے دن آرٹس گروپ کے پرچے ہوں گے۔

بلوچستان بورڈ آف انٹرمیڈیٹ اینڈ سیکنڈری ایجوکیشن کے حکام نے بتایا کہ صوبے بھر میں 400 امتحانی سینٹرز قائم کیے گئے ہیں، جہاں 1300 کے قریب امتحانی عملہ تعینات کیا گیا ہے۔ امتحانات کے دوران نقل کی روک تھام کے لیے ہر سینٹر میں ضلعی انتظامیہ کا نمائندہ بھی موجود ہوگا، جبکہ صوبائی حکام اور دیگر متعلقہ حکام سینٹرز کا دورہ کریں گے۔

امتحانی مراکز میں موبائل فونز کے استعمال پر مکمل پابندی عائد کی گئی ہے، اور سی سی ٹی وی کیمروں کے ذریعے امتحانات کی نگرانی کی جائے گی۔ اس کے علاوہ، صوبے میں امن و امان کی صورتحال کو برقرار رکھنے کے لیے 400 امتحانی سینٹرز کے اطراف دفعہ 144 نافذ کر دی گئی ہے۔