لاہور: معروف قانون دان عاصمہ جہانگیر کے انتقال پر ملکی سیاسی و سماجی شخصیات کی جانب سے تعزیت کا اظہار کیا جارہا ہے۔چیف جسٹس آف پاکستان جسٹس ثاقب نثار عاصمہ جہانگیر کے انتقال پر ان کے گھر پہنچ گئے۔
تفصیلات کے مطابق صدر مملکت ممنون حسین نے ممتاز قانون دان عاصمہ جہانگیر کے انتقال پر اظہار افسوس کرتے ہوئے کہا کہ عاصمہ جہانگیر نے قانون کی بالادستی اور جمہوریت کے استحکام کے لیے ناقابل فراموش کردار ادا کیا اور انہیں ہمیشہ یاد رکھا جائے گا۔ وزیر اعظم شاہد خاقان عباسی نے بھی عاصمہ جہانگیر کے انتقال پر گہرے رنج و غم کا اظہار کیا۔ وزیر اعظم کا کہنا تھا کہ آج ملک ایک نڈر، بہادر اور اصول پسند شخصیت سے محروم ہوگیا اور بے زبانوں، بے سہاروں اور ظالموں کے ستائے ہوئے مظلوموں کی آواز آج ہمیشہ کے لیے خاموش ہوگئی۔انہوں نے کہا کہ عاصمہ جہانگیر نے آمریت کو ڈٹ کر للکارا، انسانی حقوق کی پامالی کے خلاف بے جگری سے لڑیں اور سچ کو بے دھڑک بیان کرنے کی روایت بنی۔
چیف جسٹس آف پاکستان جسٹس میاں ثاقب نثار نے بھی عاصمہ جہانگیر کے انتقال پر ان کے گھر پہنچ کر اظہار افسوس و تعزیت کی اور ان کی خدمات کو خراج تحسین پیش کیا۔چیرمین سینیٹ رضا ربانی کا عاصمہ جہانگیرکےانتقال پرگہرے دکھ اور افسوس کا اظہار کرتے ہوئے کہنا تھا کہ پسے ہوئے طبقات کے حقوق کے لئے عاصمہ جہانگیر کی خدمات ہمیشہ یاد رکھی جائیں گی۔سابق وزیراعظم اور مسلم لیگ (ن) کے صدر نواز شریف نے بھی معروف قانون دان کے انتقال پر گہرے رنج و غم کا اظہار کیا۔انہوں نے کہا کہ جمہوریت، قانون و انصاف، انسانی حقوق اور خواتین کے لیے مرحومہ کی خدمات ہمیشہ یاد رکھی جائیں گی۔
سابق صدر اور پیپلز پارٹی کے شریک چیئرمین آصف علی زرداری نے عاصمہ جہانگیر کے انتقال کو بہت بڑا دھچکہ قرار دیتے ہوئے کہا کہ عاصمہ جہانگیر نے جمہوریت اور انسانی حقوق کے لئے بہادری سے جدوجہد کی اور وہ صرف ایک خاتون نہیں بلکہ انسانی حقوق کیلئے مو¿ثر آواز تھیں۔وزیراعلیٰ سندھ سید مراد علی شاہ نے اپنے تعزیتی بیان میں کہا کہ عاصمہ جہانگیر کی انسانی حقوق کےلئےجدوجہد ناقابل فراموش ہیں۔
صدر، وزیراعظم سمیت معروف شخصیات کی عاصمہ جہانگیر کے انتقال پر اظہار تعزیت
