اسلام آباد: وفاقی وزیر اطلاعات و نشریات عطا اللّٰہ تارڑ نے پاکستان تحریک انصاف (پی ٹی آئی) پر سخت تنقید کرتے ہوئے سوال کیا کہ "تحریک انتشار گولی چلنے کا ثبوت کیوں نہیں پیش کر رہی؟" وزیر اطلاعات نے پی ٹی آئی کے رہنما بیرسٹر گوہر کے بیان پر ردعمل دیتے ہوئے کہا کہ "جو لوگ 9 مئی کو فسادات کی آڑ میں دھول اڑاتے تھے، آج وہ ہی دھول بٹھانے کی باتیں کر رہے ہیں۔"
عطا اللّٰہ تارڑ نے مزید کہا کہ پی ٹی آئی ایک جھوٹا بیانیہ تیار کر رہی ہے اور پوچھا کہ "اگر گولی چلنے کا واقعہ سچ ہے تو اس کا ثبوت کیوں نہیں لایا جا رہا؟" انہوں نے کہا کہ "غلیلوں، بنٹوں، پتھروں اور آتشیں اسلحے سے لیس شرپسندوں نے ریاستی اداروں پر حملہ کیا، اور پھر موقع سے فرار ہو گئے۔"
وفاقی وزیر نے یہ بھی سوال کیا کہ "جو لوگ اس دن فرار ہوئے، وہ آخر کیوں بھاگے؟" اور کہا کہ "پولیس اور رینجرز کے جوانوں کو شہید اور زخمی کرنے کے بعد ان کا نقصان کون بھرے گا؟" انہوں نے مزید کہا کہ "شہید جوانوں کا خون کس کے ہاتھوں پر ہے؟"
عطا اللّٰہ تارڑ نے پی ٹی آئی پر الزام عائد کرتے ہوئے کہا کہ ان کا تشویشناک رویہ اور پرتشدد سیاست ایک معمول بنتا جا رہا ہے، اور اب وہ وقت آ چکا ہے کہ پی ٹی آئی ان الزامات کا جواب دے۔
