لاہور : محکمہ موسمیات نے ملک کے مختلف علاقوں میں بارش اور برفباری کی پیشگوئی کی ہے، جبکہ زیادہ تر علاقوں میں موسم سرد اور خشک رہنے کا امکان ہے۔
محکمہ موسمیات کے مطابق اسلام آباد اور اس کے گرد و نواح میں موسم سرد رہنے کی توقع ہے، اور پنجاب کے بیشتر اضلاع میں بھی موسم سرد اور خشک رہے گا۔ مری، گلیات اور ان کے گرد و نواح میں چند مقامات پر بارش کی پیشگوئی کی گئی ہے۔ جنوبی پنجاب کے بیشتر علاقے، جیسے ملتان، خانیوال، خانپور، رحیم یار خان اور بہاولپور میں دھند رہنے کا امکان ظاہر کیا گیا ہے۔
گلگت بلتستان میں بھی چند مقامات پر بارش اور برفباری کی توقع ہے۔ بالائی خیبرپختونخوا کے مختلف علاقوں جیسے کوہستان، چترال، دیر، سوات، بٹگرام، مانسہرہ اور ایبٹ آباد میں بارش اور برفباری ہو سکتی ہے۔ آزاد کشمیر اور ملحقہ پہاڑی علاقوں میں بھی بارش اور برفباری کا امکان ہے، جبکہ بعض میدانی علاقوں میں سرد ہوائیں چلنے کی پیشگوئی کی گئی ہے۔ بالائی سندھ میں بعض مقامات پر دھند کی شدت بھی متوقع ہے۔
