اسلام آ با د : وفاقی وزیر داخلہ محسن نقوی سے سلطنت عمان کے سفیر فہد سلیمان خلف الخروسی نے ملاقات کی، جس میں دونوں ممالک کے درمیان باہمی دلچسپی کے امور اور دوطرفہ تعلقات پر تبادلہ خیال کیا گیا۔ ملاقات میں پاکستان اور عمان کے تعلقات کو مزید مستحکم کرنے کے عزم کا اعادہ کیا گیا، اور سکیورٹی تعاون بڑھانے پر بھی اتفاق کیا گیا۔
وزیر داخلہ محسن نقوی نے اس موقع پر کہا کہ پاکستان عمان کے ساتھ اپنے برادرانہ تعلقات کو بہت اہمیت دیتا ہے، جو مشترکہ عقیدے اور ثقافت پر مبنی ہیں۔ انہوں نے مزید کہا کہ 3 لاکھ سے زائد پاکستانی عمان میں مقیم ہیں اور عمان کی ترقی میں اہم کردار ادا کر رہے ہیں۔ ان کا یہ بھی کہنا تھا کہ حکومت پاکستان کی کوشش ہے کہ مزید ہنرمند افراد کو عمان بھیجا جائے۔
عمانی سفیر فہد سلیمان خلف الخروسی نے عمان کی ترقی میں پاکستانی کمیونٹی کے کردار کو سراہتے ہوئے کہا کہ دونوں ممالک کے برادرانہ تعلقات کئی دہائیوں پر محیط ہیں اور یہ تعلقات مزید مستحکم ہوں گے۔