اوٹاوا : کینیڈا کی حکمران جماعت لبرل پارٹی نے مارک کارنے کو اپنا نیا رہنما منتخب کر لیا ہے، اور وہ وزیر اعظم جسٹن ٹروڈو کی جگہ لیں گے۔ مارک کارنے نے 85.9 فیصد ووٹ حاصل کیے ہیں۔
مارک کارنے نے اس موقع پر کہا کہ امریکی صدر ٹرمپ کی قیادت میں امریکا کینیڈا پر قبضہ کرنے کی کوشش کر رہا ہے، اور وہ ہمارے وسائل، زمین، پانی اور ملک کو اپنے کنٹرول میں لانا چاہتے ہیں۔ انہوں نے کہا کہ ہم اس بات کی اجازت نہیں دیں گے کہ ٹرمپ اپنے عزائم میں کامیاب ہوں۔
یاد رہے کہ جنوری 2025 میں وزیر اعظم جسٹن ٹروڈو نے مستعفی ہونے کا اعلان کیا تھا اور کہا تھا کہ وہ نئی قیادت کے منتخب ہونے کے بعد اپنا عہدہ چھوڑ دیں گے۔ جسٹن ٹروڈو نے 2015 میں وزیر اعظم کا عہدہ سنبھالا تھا اور اس کے بعد دو بار انتخابات میں کامیابی حاصل کی تھی۔