لاس اینجلس : امریکی شہر لاس اینجلس کے جنگلات میں لگی آگ تیزی سے پھیل گئی ہے جس نے 29 ہزار ایکٹر سے زائد رقبے کو اپنی لپیٹ میں لے لیا ہے۔ میڈیا رپورٹس کے مطابق، اس آتشزدگی کے نتیجے میں 5 افراد ہلاک ہو چکے ہیں جبکہ متعدد افراد زخمی بھی ہیں، اور اموات میں مزید اضافے کا خدشہ ظاہر کیا جا رہا ہے۔
آگ پر تین دن گزرنے کے باوجود قابو نہیں پایا جا سکا۔ غیر ملکی میڈیا کی رپورٹس کے مطابق، آگ سے متاثرہ علاقوں میں 95 ہزار صارفین بجلی سے محروم ہو گئے ہیں جبکہ 1 لاکھ 80 ہزار افراد کو فوری طور پر انخلا کی ہدایت دی گئی ہے۔
آگ نے 2 ہزار سے زائد گھروں اور عمارتوں کو جلا کر راکھ بنا دیا ہے، جن میں مشہور ہالی ووڈ شخصیات کے اربوں روپے مالیت کے مکانات بھی شامل ہیں۔ ابتدائی تخمینہ کے مطابق، آتشزدگی سے ہونے والے نقصانات 50 ارب ڈالر سے زائد ہو سکتے ہیں۔ خشک اور تیز ہواؤں کے باعث آگ کی شدت میں مزید اضافے کا خدشہ ہے۔
محکمہ فائرفائٹنگ اور مقامی حکام صورتحال کو قابو کرنے کی کوشش کر رہے ہیں، تاہم آگ کی شدت اور موسمی حالات نے ان کی کوششوں کو مزید مشکل بنا دیا ہے۔
