لاہور : محکمہ موسمیات نے ملک کے مختلف علاقوں میں گرج چمک کے ساتھ بارش کی پیشگوئی کی ہے، جبکہ بیشتر شہروں میں موسم سرد اور خشک رہنے کا امکان ہے۔
محکمہ موسمیات کا بتانا ہے کہ شمال مشرقی پنجاب میں رات کے اوقات میں شدید سردی اور جنوبی پنجاب، بالائی سندھ میں ہلکی سے درمیانی دھند چھانے کا امکان ہے۔ شام یا رات کے دوران، جنوب مشرقی پنجاب اور مشرقی سندھ میں کچھ علاقوں میں تیز ہواؤں اور گرج چمک کے ساتھ بارش کا امکان ہے۔
اسلام آباد اور گرد و نواح میں موسم سرد اور خشک رہنے کا امکان ہے، تاہم رات میں جزوی طور پر ابر آلود رہنے کی پیشگوئی کی گئی ہے۔ بلوچستان کے بیشتر اضلاع میں بھی موسم سرد اور خشک رہنے کا امکان ہے، جبکہ پہاڑی علاقوں میں رات کو شدید سردی محسوس ہو گی۔ لسبیلہ، خضدار اور قلات میں تیز ہواؤں اور گرج چمک کے ساتھ بارش کی پیشگوئی ہے۔
دوسری جانب صوبہ پنجاب کے بیشتر اضلاع میں موسم سرد اور خشک رہنے کی توقع ہے، لیکن مری، گلیات اور ان کے گرد و نواح میں موسم شدید سرد رہنے کی پیشگوئی کی گئی ہے۔ رات کے اوقات میں سیالکوٹ، نارووال، گوجرانوالہ، لاہور، شیخوپورہ، قصور اور دیگر علاقوں میں دھند چھا سکتی ہے، جبکہ کچھ علاقوں میں ہلکی سے درمیانی دھند کا امکان ہے۔ رحیم یار خان، خان پور، بہاولنگر اور ملتان میں گرج چمک کے ساتھ بارش ہو سکتی ہے۔
سندھ کے بیشتر اضلاع میں موسم سرد اور خشک رہنے کا امکان ہے، تاہم گھوٹکی، سکھر، خیرپور اور دیگر علاقوں میں تیز ہواؤں اور گرج چمک کے ساتھ بارش کی توقع ہے۔ خیبرپختونخوا کے بیشتر اضلاع میں موسم سرد رہنے کا امکان ہے، اور کشمیر و گلگت بلتستان میں شدید سردی کی پیشگوئی کی گئی ہے۔
