پشاور: گورنر خیبر پختونخوا فیصل کریم کنڈی نے ملازمین برطرفی بل 2025 کو مسترد کرتے ہوئے صوبائی حکومت سے مطالبہ کیا کہ اس بل میں فوری ترامیم کی جائیں۔
گورنر نے کہا کہ یہ بل بنیادی حقوق کی خلاف ورزی ہے اور اس میں تبدیلی ضروری ہے۔ فیصل کریم کنڈی نے غیر قانونی بھرتیوں کے ذمہ دار افسران کے خلاف سخت کارروائی کی بھی سفارش کی اور کہا کہ الیکشن کمیشن کی اجازت سے بھرتی ہونے والے ملازمین کو اس بل سے نکالنا ضروری ہے۔
انہوں نے مزید کہا کہ ملازمین کو اپیل کا حق سے محروم کرنا آئین کے آرٹیکل 10A کی خلاف ورزی ہے اور ماضی میں کی جانے والی قانونی بھرتیوں کو کالعدم قرار دینا غیر آئینی ہوگا۔
گورنر خیبر پختونخوا نے صوبائی حکومت کو بل پر نظرثانی کی ہدایت کی اور خبردار کیا کہ اگر اس پر غور نہ کیا گیا تو عدالتی چیلنجز کا سامنا کرنا پڑ سکتا ہے۔ انہوں نے کہا کہ نہ صرف ملازمین بلکہ بھرتی کرنے والے افسران بھی جوابدہ ہوں گے۔