لاہور : لاہور میں جاری سہ ملکی سیریز کے دوسرے میچ میں جنوبی افریقا نے نیوزی لینڈ کو جیت کے لیے 305 رنز کا ہدف دے دیا۔ نیوزی لینڈ نے ٹاس جیت کر پہلے بولنگ کا فیصلہ کیا، جس کے بعد جنوبی افریقا نے مقررہ 50 اوورز میں 6 وکٹوں کے نقصان پر 304 رنز بنائے۔
اس میچ میں جنوبی افریقا کے بیٹر میتھیو برٹزکے نے اپنے ڈیبیو پر شاندار 150 رنز اسکور کر کے ون ڈے کرکٹ کا نیا ریکارڈ قائم کیا۔ اس کے علاوہ ویان ملڈر نے 64 اور جیسن اسمتھ نے 41 رنز کی اہم اننگز کھیلیں۔ کیوی بولرز میٹ ہینری اور ول او رورکی نے عمدہ باؤلنگ کرتے ہوئے دو، دو وکٹیں حاصل کیں، تاہم پروٹیز بیٹرز کی بیٹنگ نے ان کے لیے مشکل پیدا کر دی۔
اب نیوزی لینڈ کے سامنے 305 رنز کا ہدف ہے، جو جیت کے لیے ایک بڑا چیلنج ثابت ہو سکتا ہے۔
نیوزی لینڈ نے گزشتہ میچ میں میزبان پاکستان کو شکست دی تھی اور آج کے میچ میں بھی کامیابی کے لیے پرعزم ہے۔
ٹاس کے بعد گفتگو کرتے ہوئے نیوزی لینڈ کے کپتان مچل سینٹنر نے کہا کہ ان کی ٹیم میں ایک تبدیلی کی گئی ہے، جس کے تحت راچن رویندرا کی جگہ ڈیون کانوے کو ٹیم میں شامل کیا گیا ہے۔ جنوبی افریقہ کے کپتان ٹیمبا باووما نے کہا کہ اگر ان کی ٹیم ٹاس جیتتی تو وہ پہلے فیلڈنگ کرتے، کیونکہ ٹیم میں نئے کھلاڑی ہیں جو اپنے کھیل کا آغاز کرنے کے لیے بہت پرجوش ہیں۔
یاد رہے کہ سہ ملکی سیریز کے پہلے میچ میں نیوزی لینڈ نے پاکستان کو 78 رنز سے شکست دی تھی۔ نیوزی لینڈ نے پہلے بیٹنگ کرتے ہوئے پاکستان کو 331 رنز کا ہدف دیا تھا، جس کے جواب میں پاکستانی ٹیم 252 رنز بنا کر آؤٹ ہو ئی تھی۔
