اسلام آباد: وکلاء کی ہڑتال کی کال کے پیش نظر وفاقی دارالحکومت میں سکیورٹی الرٹ کر دی گئی ہے، اور ٹریفک پولیس نے شہر میں امن و امان کی صورتحال کے حوالے سے ایڈوائزری جاری کی ہے۔ ٹریفک پولیس نے اعلان کیا کہ آج 10 فروری کو ریڈ زون کے داخلی اور خارجی راستے بند ہوں گے۔
جڑواں شہروں میں چلنے والی میٹرو بس سروس محدود کر دی گئی۔راولپنڈی تا اسلام آباد چلنے والی میٹرو بس آج فیض احمد فیض سٹیشن تک سروس جاری رکھے گی ، کشمیر ہائی وے تا پاک سیکریٹریٹ تک میٹرو بس سروس بند رہے گئی ۔ضلعی انتظامیہ کی ہدایت پر بس سروس کو محدود کیا گیا ہے۔
ایڈوائزری کے مطابق، ریڈ زون کے داخلی اور خارجی راستے سرینا، نادرا، میریٹ، ایکسپریس چوک اور ٹی کراس بری امام صبح 6 بجے سے تاحکم ثانی عارضی طور پر بند رہیں گے۔ پولیس نے عوام کو متبادل راستہ کے طور پر مارگلہ روڈ استعمال کرنے کی ہدایت کی ہے تاکہ کسی بھی سفری دشواری سے بچا جا سکے۔ٹریفک پولیس کی جانب سے یہ بھی کہا گیا ہے کہ اگر امن و امان کی صورتحال مزید بگڑتی ہے تو مزید راستے بند کیے جا سکتے ہیں۔
خیال رہے کہ سپریم کورٹ بار ایسوسی ایشن اور پاکستان کی تمام بار کونسلز نے مشترکہ اعلامیے میں جوڈیشل کمیشن کے اجلاس کے خلاف ہڑتال کو مسترد کر دیا ہے۔
