ریاض : سعودی عرب نے اسرائیلی وزیراعظم بنیامین نیتن یاہو کے اس بیان کو سختی سے مسترد کیا ہے جس میں انہوں نے فلسطینیوں کو بے دخل کر کے سعودی عرب میں فلسطینی ریاست قائم کرنے کی بات کی تھی۔ سعودی وزارت خارجہ نے نیتن یاہو کے بیان کو فلسطینیوں کی بے دخلی کے بارے میں اسرائیل کے موقف کو رد کرتے ہوئے کہا کہ ایسا بیان سعودی عرب کے موقف کے خلاف ہے۔
مصر نے بھی اسرائیل کے وزیراعظم کے بیان کی مذمت کی اور اسے سعودی عرب کی خودمختاری کی خلاف ورزی قرار دیا۔ مصر کا کہنا تھا کہ سعودی عرب کی سلامتی ان کی ریڈ لائن ہے، جس کا کسی بھی صورت میں تحفظ کیا جائے گا۔
دوسری جانب متحدہ عرب امارات (یو اے ای) نے بھی نیتن یاہو کے بیان کو اشتعال انگیز اور قابل مذمت قرار دیا۔ یو اے ای وزارت خارجہ نے اپنے بیان میں کہا کہ اسرائیلی وزیراعظم کا یہ بیان بین الاقوامی قانون کی کھلی خلاف ورزی ہے اور علاقائی استحکام صرف دو ریاستی حل کے ذریعے ہی حاصل کیا جا سکتا ہے۔
واضح رہے کہ اسرائیلی وزیراعظم نیتن یاہو نے اپنے حالیہ دورہ امریکہ کے دوران اسرائیلی میڈیا کو انٹرویو دیتے ہوئے کہا تھا کہ فلسطینی ریاست کا قیام اسرائیل کی سلامتی کے لیے خطرہ ہو سکتا ہے اور سعودی عرب میں فلسطینی ریاست قائم کی جا سکتی ہے کیونکہ سعودی عرب کے پاس زمین کی کمی نہیں ہے۔
